Seemannsgarn mit nöiem Aubum “Chräienäscht”

Seemannsgarn bringe am 11. Februar ihres dritte Aubum use (digitau chöit dirs scho ga chouffe). Da di vier Burschte usem Ämmitau ja Mundart singe hani dänkt, i mache kener haube Sache u schribe die Vorschou uf das Album grad uf Dialäkt. „Chräienäscht“ hei sis touft, das nöie Wärch. Auso so richtig touft wirds ja de ersch no, nämlech o grad am Samschtig, 11. Februar ir Ruumbar vom Kofmäu ds Solothurn.

Fömer doch grad mau mit dr Verpackig a vo däm guete Stück. Ds Chräienäscht isch das, wome hie gseht.  Es dünkt mi fasch, aus ob ds Sujet vom letschte Aubum „Dr Wäg ads Meer“ wieder chli ufgriffe isch worde. Ömu da dä Seemaa gseht ähnlech us und ou viu Wasser gseht me wieder. Är gseht chli schiffsbrüchig us, dä arm Maa i sim Fass, oder äbe Chräienäscht – obs ächt a däm usbrochnige Vulkan ligt, wo ane Atompiuz erinneret? Item, dr Adrian Isenschmid het da ömu ä hübschi Zeichnig gliferet wo dr Titu vom Aubum schön duet wiederspiegle.

Musikalisch wird eim de o wieder das gliferet, wo me vo Seemannsgarn kennt: Punkrock uf Mundart, mit kritische und nachdänkleche Tegschte. Grad viu markanter aus uf em zwöite Aubum chunnt „Chräienäscht“ nid drhär, aber die Sumiswauder blibe sech treu. I muess auso säge, dass mir die Tegschte scho no zuesäge. Grad aus würd ig villech nid ungerschribe, aber es regt zum nachedänke a, vermittlet aber o ä gwüssi Portion Zueversicht und positivers Dänke aus ou scho. O we ds Intro bim erschte Lied „Log Nr 13“ mit sanfte Klavierkläng und Meeresruusche afat, blibt am Sänger Kobe sini Schtimm wie gwohnt ruch.

Dr Song „Nid Perfekt“ seits schön: „Es muess nid grad perfekt si, ächli Spiu het me geng. We nid jedes Detail stimmt, isch das nume haub so schlimm.“ I gloube, das git die neue Kläng vo Seemannsgarn gar nid so schlächt wieder. Nämet ömu mau es Ohr vou, we dir Punk ir Kombination mit Mundart möget.

chraeienaescht

VÖ: 12.01.2017 (digitau)

Log Nr 13
Ke Meter
Chräienäscht
Dr Mond
Es geit de scho
Nid perfekt
Lüchtreklame
10 Minute
Heude
Offeni Frage